Walter Däpp erfindet seine Geschichten nicht. Er findet sie im realen Leben, sei es als Journalist, sei es als Geschichtenerzähler. Der bekannte Berner Mundartautor beobachtet seine Umwelt und hat die Gabe, aus Alltäglichem Allgemeingültiges zu machen. So entstehen Geschichten, in denen man sich wiedererkennt. Im neusten Sammelband «So alt wie hütt bin i no nie gsi» geht es ums Älterwerden. Hier die dritte Geschichte, mit freundlicher Genehmigung des Verlags, in Ton und Text.
Si het gäng für ne gsorget. Es Läbe lang.
Si het gchochet, het putzt, het d Hemmli glettet, d Stüürerklärig usgfüllt. U gluegt, dass gäng gnue Brot u Milch umen isch. Är het sech dra gwöhnt, dass si ne het verwöhnt. Dass si het gchochet, putzt, d Hemmli glettet, d Stüürerklärig usgfüllt u gluegt, dass gäng gnue Brot u Milch umen isch.
Si het gäng ds Chübeli mit em Komposcht i Garte ta, wes wider voll isch gsi. Si het o gäng gluegt, öbs no gnue Zahnpaschta het gha. U si het em gäng wider ds Arthrosechnöi massiert u ne gfragt, öbs guet heig ta. Dadruuf het er öppe mau mutz gseit: «Ja.» U är hets o chuum gmerkt, dass si wider ds volle Komposchtchübeli i Garte het ta u het gluegt, öbs no gnue Zahnpaschta het gha.
Walter Däpp, Journalist und Buchautor. Foto: PS
Si het zu vilne Lüt e guete Draht gha. Si het Geburtstäg, Yladige u o d Yzahlige im Griff gha. U klar, dass si – wes wider nötig isch gsi – Klarglanz i d Abwäschmaschine het ta. Dank ihre het o är zu vilne Lüt e guete Draht gha. Aber är hets chuum gmerkt, dass si Geburtstäg, Yladige u o d Yzahlige het im Griff gha. U dass si – wes wider nötig isch gsi – Klarglanz i d Abwäschmaschine het ta.
Si het gseit, für ihn heig sis gäng gärn gmacht. Är het gseit, si heiges gäng so gmacht. U beidi hei gseit, si heiges zäme gäng guet gha. Chli z dänke het ne nume ggä, dass de äuä mau ds Einte vor em Angere mues gah.
«Wi wärs äch de», het är gmurmlet, «wen i plötzlech no uf eigete Bei müesst stah?» U si het sech gfragt: «Für wän wär i de no da?»
Walter Däpp, «So alt wie hütt bin i no nie gsi», Zytglogge-Verlag, 2021, ISBN 978-3-7296-5063-3
Titelfoto: Pixabay
Die bisherigen Artikel über Walter Däpps Alters-Geschichten: